الأحد، 23 أكتوبر 2011

قصيدتان فى هجاء السادات - أحمد فؤاد نجم

أوأه

هذه القصيدة ل أنور السادات كلمات أحمد فؤاد نجم وغناء الشيخ إمام

أوأه المجنون أبو برقوقة
بزبيبة غش وملزوقة
عيرة وبرانى وملزوقة
نصاب ومنافق وحرامى
ودماغه مليانة مناطق موبوءة
والنكتة كمان انه حلنجى
وعامل لى فكاكة وحندوقة
مع إن الجحش أفهم منه
والعالم فاهمة ومفلوقة
بسلامته بيسرح قال بينا
يعنى إحنا مواشى يا زقزوقة
دا إحنا الحريفة العريفة
غيرش الأيام المدعوقة
شفت الولدات الشلبية
ليلة التحرير يا أسطى فاروقة
دول هما ولادنا وأكبادنا
وقلوبنا عليهم مشقوقة
يا سلام يا صلاة النبى أحسن
على جيل العلم يا مرزوقة
حلوين وحياتك يا بلدنا
يا أم الخيرات المسروقة
إحنا اللى رمينا البذراية
وروينا الأرض المعزوقة
وحنحصد بكره وحنغنى
وعيون الخاين مخزوقة

******

إحنا معاك

***
إحنا معاك .. إحنا معاك
ريسنا يا أنور
إحنا معاك .. إحنا معاك
تخرب تعمر
***
إحنا معاك يا أبو لمعة يا قمعة
يا اللي خربت بلدنا ف جمعة
إحنا معاك مهما تغلبنا
نجري وراك ونبيع مبادئنا
إحنا معاك .. إحنا معاك
***
إحنا معاك يا بايع أراضينا
يلي سايب أعدائنا ف سينا
بكره يا ريس بكره تخلي
الاستعمار يتحكم فينا
إحنا معاك .. إحنا معاك
***
إحنا معاك يا بطل مغوار
شوفنا الست ف خط النار
بكره الحلوة تقابل وزرا
وانت يا ريس تعمل زار
إحنا معاك .. إحنا معاك
***
إحنا معاك يا طابخ ف الأنجر
رز بكاري وسلطة بنجر
عامل لي نفسك ولا بيكاديللي
وانت منفذ أمر كسينجر
إحنا معاك .. إحنا معاك